Viltu vinna milljarð

Viltu vinna milljarð eftir Vikas Swarup fjallar um Indverjann Ram Mohammad Thomas. Ram er 18 ára barþjónn sem býr í fátækrahverfi og á varla fyrir mat. Hann tekur þátt í nýrri spurningakeppni sem ber heitið ,,Viltu vinna milljarð" og hann svarar hverri einustu spurningu rétt.
Nú tekur við hið ljúfa líf eða hvað.
Morguninn eftir spurningakeppnina ryðst lögreglan inn til Ram og handtekur hann. Honum er gefið að sök að hafa svindlað í keppninni. Í hinu stéttskipta Indlandi hefur Ram lært að svara ekki fyrir sig, hann mótmælir ekki lögreglunni, reynir ekki að halda fram sakleysi sínu og hann veit að það kemur honum enginn til hjálpar. Lífið er búið og Ram er mátulega rólegur yfir því.
Þegar ung kona birtist á lögreglustöðinni og kynnir sig sem lögfræðinginn hans, veit Ram ekki hvernig hann á að bregðast við, hann uppgötvar að hugsanlega á hann einhverja von.
Það er hér sem hin eiginlega saga hefst, Ram Mohammad Thomas segir lögfræðingnum og lesandanum ævisögu sína spurningu fyrir spurningu. Allt sem hann hefur lært á skrautlegu og erfiðu lífshlaupi sínu og varð þess valdandi að hann vissi það sem hann þurfti að vita kvöldið áður. Thomas hefur misst foreldra sína, myrt mann, unnið fyrir fræga leikkonu, komið upp um ástralskan gagnnjósnara og orðið ástfanginn. Hann hefur upplifað gleði sem iðulega endar með hörmungum. Allan tímann hefur honum tekist að bjarga sér og sá Ram sem við kynnumst er sjarmerandi og áhugaverður karakter sem lífinu hefur ekki tekist að eyðileggja þrátt fyrir ítrekaðar tilraunir.
Lesandinn dregst inn í veröld indverskra vændiskvenna, ferðast um Taj Mahal, kynnist undraheimum Bollywood og lífi barna í einu stærsta fátækrahverfi í Indlandi. Sagan er á stundum væmin, en eftir lesturinn er hamingja Ram Mohammad Thomas það eina sem skiptir lesandann máli, hann fær allt sem hann vil og meira og það er væmninnar virði.

Góða skemmtun.

How to be good eftir Nick Hornby.

How to be good er skemmtileg saga, uppfull af kaldhæðnum húmor og óspart gert grín að tvískinningnum í daglegu lífi fólks.
Sagan fjallar um Katie Carr, tæplega fertuga konu, tveggja barna móður, eiginkonu, lækni og að eigin sögn góða manneskju. Í upphafi sögunnar tilkynnir Katie, David eiginmanni sínum að hún vilji skilnað. Nokkrum mínútum síðar finnur hún sér elskhuga og stingur af, af læknaráðstefnu til að eyða með honum nóttinni.
David, er kaldhæðinn og úrillur blaðamaður. Katie og hann hafa verið saman í 24 ár og hjónabandið er fyrir löngu orðið kalt, erfitt og leiðinlegt. Þau búa saman af gömlum vana og vegna barnanna. Það verður ekkert úr skilnaðnum, en Katie er í stöðugri endurskoðun á sjálfri sér og reynir að halda í skilgreininguna góð manneskja. Hennar heitasta ósk er að David, verði allt öðruvísi en hann er.
Ósk hennar rætist þegar David hittir lífsgúrúinn og andalækninn DJ GoodNews. Kynnin við DJ GoodNew umturna persónuleika hans og lífi allrar fjölskyldunnar. David týnir kaldhæðninni og verður ,,góð“ manneskja. Hann byrjar á því að gefa leikföng barnanna til fátækra, býður heimilislausum unglingi að flytja til þeirra, skipar börnunum að leika við krakka sem þau þola ekki og fer með fjölskyldu-máltíðirnar út og deilir honum með þeim sem búa á götunni. David hættir líka að vinna, til að geta einbeitt sér að því umfangsmikla verkefni að bjarga heiminum.
Góðmennska Davids felst ekki í pólitískri rétthugsun, eða styrkjum til mikilvægra málefna. Hans góðmennska felst í aðgerðum sem hefur bein áhrif á daglegt líf allra í kringum hann og honum tekst á óþolandi hátt að koma inn samviskubiti hjá Katie, dóttur þeirra og nágrönnunum, vegna alls þess sem þau eiga umfram þá ,,lánlausustu“ í veröldinni.
Katie reynir að taka þátt í starfi Davids, því hún er góð manneskja. Hún hefur stöðugt samviskubit yfir minnstu ,,göllum“ í eigin persónuleika, henni líkar misvel við sjúklingana, vil ekki gefa fátækum matinn sinn og hefur engan áhuga á því að hýsa heimilislausan ungling, sem stelur frá þeim. Að lokum gefst hún upp og hættir að reyna að vera ,,góð“.
Hún útskýrir fyrir David að hún hafi ekki bolmagn til að bjarga heiminum og sé ekki tilbúinn til að fórna meiru en smápeningum til þess verkefnis. Hún bendir honum á að vegna björgunarleiðangursins, sé fjölskyldan orðin blönk og börnin óhamingjusöm. David finnst hún sjálfselsk, eins og næstum allir aðrir en gefst að endingu sjálfur upp á risavöxnu verkefni sínu.
Þau enda sem hefðbundinn fjölskylda, vel stæð, pólitískt rétthugsandi og styrkja með peningum mikilvæg málefni. Hjónabandið er hvorki gott né slæmt, börnin hvorki ánægð né óánægð og fjölskyldan kannski aðeins meira hamingjusöm en óhamingjusöm. OG Katie Carr er GÓÐ MANNESKJA.
How to be good er skemmtileg og fljótleg lesning og húmorinn í henni nær því að vera kaldhæðinn, án þess að hafa fyrirlitningartón, sem er bæði sjaldgæft og gott. Góð bók til að lesa í jólafríinu.

Karlar sem hata konur eftir Stieg Larson

Karlar sem hata konur er hörkuspennandi og vel skrifuð glæpasaga. Aðalpersónurnar eru blaðamaðurinn Mikael Blomkvist og Lisbeth Salander. Mikael Blomkvist er gagnrýninn viðskiptablaðamaður og eigandi hins róttæka dagblaðs Millenium. Hann er þessi yndislega týpa, sem vil öllum vel, er góðhjartaður og vel gefinn. Hlutverk hans sem gagnrýnins viðskiptablaðamanns gerir hann spennandi, hann er maður með hugsjón og tilbúinn að ganga langt til að lifa og starfa í samræmi við sína hugsjón.
Lisbeth Salander er að mörgu leyti andstaða Blomkvist, hún er reið kona á þrítugsaldri. Lífið hefur farið illa með hana og frá barnæsku hefur hún hvergi passað inn. Lisbeth er hörkutól, sem hleypir fáum að sér og er iðulega vanmetinn af samferðafólki sínu. Lisbeth er afburðargreind, er góður tölvuhakkar og starfar við persónunjósnir, fyrir sænskt öryggisfyrirtæki.
Karlar sem hata konur er í raun fjórar sögur, vafðar saman í eina og lesandinn fylgist spenntur með framvindu þeirra allra. Aðalsagan er rannsóknin á hvarfi hinnar 16 ára gömlu Harriet, hinar eru sagan um undarlegt ástarsamband aðalpersónanna, sagan um uppljóstrun á starfsemi fjárglæframannsins Wennerström og sagan um lífróður Millenium blaðaútgáfunnar.
Í upphafi sögunnar er Mikael Blomkvist dæmdur fyrir rógburð gegn viðskiptajöfrinum Wennerström. Í kjölfarið yfirgefur hann Millenium tímabundið og fer upp í sveit þar sem hann hafði verið beðinn að taka að sér að rannsaka hvað hafði orðið um Harriet Wanger fyrir 30 árum síðan.
Henrik Vanger gamall iðnjöfur og frændi Harriet, réð Blomkvist til verksins. Vanger hafði aldrei náð að sætta sig við að rannsóknin á hvarfi frænku hans hafði verið lokað. Hann var viss um að hún hafði verið myrt og það sem meira er, hann var viss um að einhver í fjölskyldunni hefði myrt hana. Eftir margra ára sjálfstæða rannsókn á málinu, ákveður hann að fá inn Mikael Blomkvist og tekst að sannfæra hann, með því að lofa því að veita honum upplýsingar um Wennerström.
Lisbeth Salander gengur fljótlega til liðs við hann og saman uppgötva þau óhugnanleg leyndarmál Wanger fjölskyldunnar og tekst að leysa málið. Á meðan á rannsókninni stendur myndast sterk tilfinningatengsl á milli Lisbeth og Mikael og lesandinn fær það á tilfinninguna að hin unga Lisbeth sé þarna ástfanginn í fyrsta sinn. Þau eru skemmtilegt skáldsögupar, gjörólík að öllu leyti en bæta hvort annað snilldarlega vel upp. Lausn morðgátunnar, fléttast síðan á skemmtilegan hátt saman við afdrif Millenium og viðskiptajöfursins Wenneström.
Sagan er eins og áður sagði hörkuspennandi, svolítið lengi að fara af stað en undirrituð ber þess vitni að þessa bók er ekki hægt að leggja frá sér fyrr en eftir síðasta punktinn.

Flugdrekahlauparinn eftir Khaleid Hosseini

Flugdrekahlauparinn er falleg saga sem gerist í hörmulegu umhverfi. Þetta er þroskasaga Amirs, sem vex upp í Afganistan á 7 og 8 áratug síðustu aldar. Amir býr með Baba föður sínum, sem er virtur viðskiptamaður í Kabúl. Næstu nágrannar og í raun nánasta fjölskylda eru þjónninn Ali, sem er uppeldisbróðir Baba og sonur hans Hassan, jafnaldri Amirs.
Amir og Hassan eru óaðskiljanlegir, líkari bræðrum en vinum, en vegna þjóðfélagsstöðu Hassans viðurkennir Amir hann ekki að fullu sem vin. Árið sem drengirnir eru 12 ára verður röð skelfilegra atburða til þess að umturna lífi þeirra og slíta á vináttu þeirra til frambúðar. Þetta sama ár 1978, tóku kommúnistar völdin í Afganistan. Baba sá fram á að honum yrði ekki vært í stjórnartíð þeirra og tók þá ákvörðun að flýja land ásamt syni sínum, þeir héldu til Pakistan og þaðan til Bandaríkjanna.
Atburðir fortíðarinnar sitja bæði í Amir og Baba, Baba er áfram virtur í hinu Afganska samfélagi en að öðru leyti ,,bara“ fátækur bensínafgreiðslumaður og innflytjandi. Stolt hans er sært og hann vonast til þess að sonurinn fái bæði betra líf og geti endurreist heiður hans. Amir heldur fast í gamlan draum um að leggja fyrir sig ritstörf og báðir leiða þeir hugan að Hassan. Amir hefur samviskubit vegna hræðilegra atburða sem hann telur sig ábyrgan fyrir en hefur stimplað sjálfan sig heigul og ,,sætt“ sig við heigulshátt sem persónueinkenni.
Lífið heldur sinn vanagang, Amir verður ástfanginn giftist og skapar sér ágætis líf með eiginkonu sinni. Æskudraumurinn um að lifa af ritstörfum rætist en það setur strik í reikninginn að hann og eiginkonan geta ekki eignast barn. Samviskubitið vegna vinarins gamla ágerist, hann lítur á heigulsháttinn sem bæði sinn bjargvætt og ástæðu alls þess sem aflaga fer í lífi hans. Gamla lífið bankar svo upp á þegar hann fær bréf frá gömlum vini Baba, sem biður hann að koma til Pakistan.
Ferðin átti að vera stutt en endaði með hættulegum björgunarleiðangri til Afganistan. Hassan er látinn, var myrtur af Talibönunum og Amir ætlar að bjarga syni hans. Í stuttu máli þá verður ferðin erfiðari en Amir hafði gert ráð fyrir, hann þarf að horfast í augu við að gamla Afganistan er í rústum, hann þarf að takast á við eigið samviskubit og endurmeta heigulsstimpilinn. Barátta við yfirvöld bæði í Afganistan og Bandaríkjunum endar á þann veg að Amir kemst heim með drenginn. Hann og kona hans ættleiða hann og Amir fær þannig tækifæri til að bæta fyrir brot sitt gegn Hassan. Sagan endar á raunsæjan hátt, þetta er ekki hinn fullkomni endir, en eflaust eins góður og aðstæður mögulega leyfðu.
Flugdrekahlauparinn er vel skrifuð saga sem veitir lesendanum innsýn inn í veröld Afgana heima og að heiman. Sagan er eins Isabelle Allende orðaði það ,,ein af þessum ógleymanlegu og einstöku bókum sem lætur mann ekki í friði".

Komiði sæl.

Þetta blogg er eftir bókasafns- og upplýsingafræðinema og bókaorm. Hluti af náminu er að blogga og hér verður bloggað. Bloggað um bækur á óformlegan, skemmtilegan og jafnvel svolítið skrýtinn hátt. Bækurnar sem þið fáið að heyra um eru bækur sem ég hef lesið og líkað misvel og ritstíllinn fer alfarið eftir því í hvernig skapi höfundurinn verður á meðan hún skrifar. Njótið vel og verið óhrædd við að kommenta.